ووته‌ی سه‌روك مسعود بارزانی له‌ زاخۆ به‌ تێكست و ویدیو

ب ناڤێ خودایێ مەزن و دلۆڤان

خویشك و برایێن بەركەفتی، پێشمەرگەهێن قارەمانێن شۆرەشا ئیلۆنا مەزن، هەموو ئامادەبوویێن بەرێز...

بۆ من شەرەفەكا مەزن بوو كو هوون دەعوەتا من بكەن و ئەز بهێم بەشداریێ ل گەل هەوە بكەم د رۆژەكا هۆسا یا پیرۆز دا، ل جهەكێ هۆسا پیرۆز كو هێلینا شۆرەش و بەرخودانێ یە، ئەو ژی دەڤەرا زاخۆیە، ئەز سوپاسیا هەوە دكەم كو هەوە ئەڤ شەرەفە دایە من.

ئەز ل ڤێ دەرفەتێ، پیرۆزباهیەكا گەرم ل هەموو گەلێ كوردستانێ دكەم، بۆ ڤێ بیرەوەریا هۆسا پیرۆز و ب راستی بۆ من ئەو پێشمەرگەهێن قەهرەمان یێن شۆرەشا ئیلۆنێ ئەڤێن كو ماین د ژیانێ دا، و ب تڤەنگێن خۆ یێن برنۆڤە من دیتین رۆحەكا دی دا مە، ئەم برینە ڤە بۆ وان رۆژێن سەختێن خەبات و تێكوشانێ كو ب وێ لویلیا برنۆیێ ب وێ چاندكێ خۆ وان ئەڤرۆ دروست كر، ئەوێن شەهید بووین خودێ رەحمەتا خۆ لێ بكەت و جهێ وان بەحەشتە، ئەڤێن ماین ژی بۆ مە جهێ فەخر و شانازیێ نە، ئەو گەنجێن كو قەدرێ ڤانە دزانن قەدرێ خۆ و قەدرێ مللەتێ خۆ و قەدرێ مێژوویا خۆ و قەدرێ پاشەرۆژا خۆ ژی دێ زانن، ئەوێن قەدرێ ڤان قەهرەمانان نەزانن وەكی وێ دارێ نە یا كو چو ره و ریشال نەبن و بایەكێ سڤك ژی بهێت دێ ئێخیت، ئەو ژی دێ د وەسا بن د ناڤ كوردستانێ دا، ژ بەر كو هەكە مرۆڤی رێز و حورمەت نەبیت بۆ مێژوویا خۆ و بۆ خەباتا خۆ و رۆلێ قەهرەمانێن مللەتێ خۆ، وەللا چو پاشەرۆژ ژی نابیت.

شۆرەشا ئیلۆنێ نە ب تنێ ل دژی دكتاتوریەتێ بوو، شۆرەشا ئیلۆنێ مێژوویەكا نوو دروستكر، راستە شۆرەشا ئیلۆنێ ل دژی دكتاتۆریەتێ بوو، لێ شۆرەشەكا كومەلایتی و كولتووری و سیاسی بوو، و شۆرەشەكا نەتەوەیی هەم ل خانەقینێ هەتا زاخۆ پێكڤە مللەتێ كورد ب ئێك دەست و ئێك پارچە و د بن ئێك سەركردایەتی دا چەند جاران چووك ب رژێمێن بەغدا دا دانا بۆ هندێ دانپێدانێ ب مافێن مللەتێ كورد بكەن.

چەندین كوڕێن زاخۆ و دهۆكێ و ئامێدیێ و شێخان ل هەلەبجە و خانەقین و قەرەداخ شەهید بوون و چەندین كوڕێن خانەقینی و هەلەبجە و سلێمانی و كەركووكی ژی ل ڤێ دەڤەرێ یێن شەهید بووین، ئەڤە بۆ ئێكەم جار بوو د مێژوویا مللەتێ كورد دا شۆرەشەكا هۆسا یا نەتەوەیی ب ڤی رەنگی بیت، گەلەك جاران شۆرەش دبوون سەرهەلدان دبوون، لێ د دەڤەری بوون و نە دبوونە بزاڤێن نەتەوەیی د ناحیا مەیدانی ڤە، ژ بەر هندێ ب راستی شۆرەشا ئیلۆنێ مێژوویەكا نوو دروستكر و ل نك من ل هەموویێ گرنگتر شۆرەشا ئیلۆنێ باوەری بۆ گەلێ كوردستانێ و بۆ هەر تاكەكێ كورد دروستكر كو باوەری ب خۆ هەبیت، بەلێ ئەم مللەتەكین مە مافێ هەی و ئەم د ئامادەینە ب مرین د رێكا بدەستڤەئینانا سەركەفتنێ و مافێن گەلێ خۆ، بەری شۆرەشا ئیلۆنێ ئەو باوەری ب خۆ نەبوو و مللەتێ كورد زور خۆ ب غەریب و بێ كەس دزانی و بەرامبەر خەلكێ دی خۆ ب كێم دزانی، لێ شۆرەشا ئیلۆنێ ئەو دیوار شكاند، من نەڤێت چو جاران ئەم تووشی غرورێ ببین، لێ من نەڤیایە چو جاران ئەز كوردەكێ ل ڤێ د دونیایێ دا ببینم خۆ ل چو كەسەكی كێمتر بزانیت، ئەو مرۆڤن ئەم ژی مرۆڤین، وان مافێ ژیانێ یێ هەی و مە ژی مافێ ژیانێ یێ هەی، شۆرەشا ئیلۆنێ دوپاتكر بۆ مە كو هەكە مللەتەك ئامادەبیت بۆ قوربانیدانێ دێ بەرهەم ژی هەبیت و ئەڤرۆ بەرهەمێ وێ خەباتێ وێ تێكوشانێ یە و یا ژ هەموویێ ژی گرنكتر ژ بۆ مە ئەڤەیە كو ئەم د سەربلندین ب شۆرەشا ئیلۆنێ، ژ بەر كو شۆرەشەكا پاك بوو، شۆرەشەكا ب ئەخلاق بوو، و بۆ ئێكجار ژی كارەكێ نەقانوونی نەهاتە كرن، كارەكی نەمرۆڤایەتی ل گەل دوژمنێن مە نەهاتە كرن، نە مەعنا وێ ئەو بوو مە نەدشیا، مە دشیا گەلەك تشتان بكەین، لێ شۆرەشەك بوو راستا شۆرەشا ئەخلاقی بوو، پێشمەرگەهەكێ ب ئەخلاق برایێ وی ل تەنشتا وی شەهید دبوو، دا لەشكر یان هەر كەسەك ئێخسیر بیت، دا ئینیت نانی دەتێ و خودان كەت و ئینیت رادەست كەت و رۆژەكێ ژ رۆژان ئێخسیرەك نەهاتە كوشتن، ئەڤ ئەخلاقێ بلند جهێ سەربلندیێ یە و سەروەریەكا گەلەك یا مەزن بوو، ب راستی بۆ پارتی دیموكراتی كوردستان ب سەرۆكایەتیا بارزانی كو ئەڤ میژوویە دروستكر و هەر تشتەكێ ژ نوكە پێڤە بهێتە دروستكرن بناغێ وێ یێ شۆرەشا ئیلۆنێ یە و ل سەر وی بناغەی دهێتە دروستكرن.

من دڤێت ل ڤێرە ئەز بۆ ڤان قەهرەمانان و بۆ ڤی مللەتی دوپات بكەم، ب ئانەهیا خودێ هەتا دووماهی نەفەس، دێ د بەردەوام بین ل سەر وان بنەما و رەوشتان و ل سەر رێكا وان و بۆ من ب خۆ وەكو كەس ب راستی تشتێ كو ئەز گەلەك شانازیێ پێ دكەم، ئەز ژی ئێك ژ وان پێشمەرگێن شۆرەشا ئیلۆنێ بوویمە، مەزنترین شەرەفە مەزنترین سەروەریە مەزنترین پۆستە د دونیایێ دا سەبارەت من، پێدڤیە ئەم بەردەوام رەوشت و رۆحا شۆرەشا ئیلۆنێ زیندی بهێلین، ئەو ژی ب یادكرنا وێ یە و گەلەك جاران كۆمبوون و سمیناران بۆ گەنجێن مە بكەن و تێبگەهینن كو كەسێ خێر ب مە نەكریە و ئەڤ بارودۆخە یێ ب خوینا هزارەهان شەهیدێن قەهرەمانە نموونەیەك ژ وێ، ئەڤرۆ بەری بهێینە ڤێ هۆلێ وێنێن وان، ناڤێن وان ل هۆلا تەنشت ڤێرە هاتبوونە هەلاویستن، و ئەڤە نموونێن هزارەهان شەهیدێن دی نە یێن كو هەڤالێن وان، برایێن وان گیانێ خۆ كریە قوربانی ژ بۆ هندێ ئەڤرۆ ل سایا سەرێ وان و ڤان قەهرەمانێن مایی ئەڤە بارودوخێ مە و ئەم یێ ڤی نانی دخوین لوتفا خودێ یە، لێ دەولەت سەرێ وان شەهیدان و ڤان قەرهەمانان شەهیدێن زیندی یێن كو مایی، هەكە مرۆڤی د دونیایێ دا وەفا نەبیت، سیفەتێ مرۆڤایەتیێ ل سەر نابیت، ئەوێن زەحمەت دیتی و ماندیبوون دیتی و خەبات كری و گیانێ خۆ كریە قوربانی، چاوا دێ هێنە ژبیركرن هەر چو نەبیت ب ئاخفتنەكا خۆش.

من دڤێت ئەز ب ڤێ هەلكەفتێ بۆ هەوەیێن بەرێز عەرزكەم كو مە بریار یا دای و من كیتاب ژی بۆ سەرۆكاتیا جڤاتا وەزیران یا نڤیسی، رێزگرتن بۆ خەبات و تێكوشانا ڤێ دەڤەرێ كو ببیتە ئیدارەیەك، بۆ هندێ دا باشتر خزمەتا ڤێ دەڤەرێ بهێتەكرن و ب ئانەهیا خودێ ل ڤان نێزیكان دێ كەڤیتە د وارێ بجهئینانێ دا و ئەڤە ژی دیاریا مەیە بۆ هەوە د ڤێ هەلكەفتا پیرۆز دا.

بابەتەكێ دی من دڤێت ئەز ئاماژێ پێ بدەم كو ئەڤ بارودوخێ نەیێ سروشتی یە ل سەر ڤان سنۆران، سنۆرێ هەرێمێ ل گەل توركیا و ل گەل ئیرانێ ژی. من دڤێت ئەز گەلەك یێ راستگۆ و زەلال بم ل گەل هەوە، و ل گەل مللەتێ كورد و ل گەل هەموو ئالیەكی، ئەم گەلەك پێ د نەخۆشین و ئەڤ بارودۆخە مە د ئێشینیت و هەتا نها پتر ژ 400 گوندێن هەرێما كوردستانێ نەهاتینە ئاڤەدانكرن ل بەر ڤی بارودوخێ نەیێ سروشتی ب تایبەتی هێلا سنۆری، تەقریبەن هەر ل زاخۆ هەتا دچیتە قەلادزێ، مە گەلەك بزاڤ یێن كرین و دێ د بەردەوام ژی بین رادەیەك بۆ ڤی بارودۆخی بهێتە دانان، وەختێ كو مە مفاتحا توركیا و ئیرانێ كری كا بۆچی سنۆرێن مە ب تەیارا و تۆپا تۆپباران دكەن، بەرسڤا وان ئەوە دبێژن مە تشتەك ل گەل هەرێمێ نینە، هەرێم كەتوارەكە دەستوورێ عیراقێ دانپێدان یا پێكری و ئەڤە بارودۆخەكێ قانوونی یە سەبارەت مە، ژ بەر هندێ ئەم دێ سەرەدەریێ ل گەل كەین، لێ خەلكەكێ هەی د ناڤ ئاخا هەرێمێ دا و ل سەر سنۆری دهێن خەلكێ مە لەشكر و پاسدارێن مە دكوژن و دهێنە د ناڤ ئاخا هەرێمێ دا، یان هوون هێزێن خۆ بۆ سنۆری بینن مە چو ئاریشە نابن، یان ئەڤ خەلكێ ل سنۆری باوەریێ بۆ چێ كەن كو دەڤەرێ بەردەن، یان كریارێن لەشكری ل دژی مە نەكەن، دیسا مە چو ئاریشە نینن، لێ بهێن لەشكر و پاسدار و خەلكێ مە بكوژن و بهێنە د دەڤەرێ دا، ئەم نەچارین بەرەڤانیێ ل خۆ بكەین، ئەڤ بەهانەیە یا دكەڤیتە د دەستێن وان دا، هەكە ئەڤ بەهانەیە نەبیت ئەو نەشێن هەرێما كوردستانێ تۆپباران بكەن و هەكە كر ژی دێ گەلەك گران ل سەر وان راوەستیت، مە گەلەك بزاڤ یێن كرین ب خوشی و لێكگەهشتن و بەرچاڤگرتن چ ل گەل پەكەكێ و چ ل گەل پژاكێ ژی، كو ئێدی بارودۆخێ هەرێمێ بەرچاڤ بگرن. ئەم یێن ل گەل مافێن مللەتێ كورد دا و نابێژینی خەباتا خۆ نەكەن، لێ باوەر بكەن زەمانێ شەری نەمایە، ئانكو شەركرن د ڤی بارودۆخی دا زیانا وێ پترە، دەمێ دەرفەت هەبیت تو ل ئەنقەرە د ناڤ پەرلەمانێ توركیا دا 30 یان40 یان 50 پەرلەمانتارێن تە هەبن تو ل وێرێ شەرێ خۆ بكە و سەد بەرامبەر دێ دەستكەفتان ب دەستڤە ئینی، دونیا هەموو دێ ئاگەهدار بیت ژ بارودۆخێ تە، رەنگە بەری 20 یان سیه چل سالان ئەم نەچاربووین وەكو بزاڤا رزگاریخوازا كوردستانێ ل هەر پارچەیەكێ تو شەرێ خۆ بكەی، ژ بەر كو شەرێ مان و نەمانێ بوو، شەرێ پاراستنا پێناسەیا نەتەوەیی بوو، مە ئەو قۆناغ دەربازكر، ئەڤرۆ ل هەولێرێ پتر ژ 20 قۆنسولگەری و نڤیسینگەهێن فەرمی یێن دەولەتان یێن هەین، نێزیكی چوار دەولەتێن ئەندام د جڤاتا ئێمناهیێ دا یێن هەین قونسلگەریێن وان یێ ل وێرێ، سەرەدەری ل گەل هەرێما كوردستانێ وەكو سەرەدەریەكا فەرمی یا دهێتە كرن، ئەڤە دەستكەفتە بۆ هەموو مللەتێ كورد بۆ هەر كوردەكێ د ناڤ هەرێما كوردستانێ دا د ناڤ كوردستانا باشوور دا یان هەر پارچەیەكا دی، كارەكێ بكەی بۆ تێكدانا ڤی بارودۆخی مەزنترین تێكدانە بەرامبەر نەتەوا كورد دكەت.

وەختێ من سەرۆكاتیا هەرێمێ قەبوول كری، من هندەك ئارمانجێن خۆ هەبوون، من بۆ هندێ نەبوویە بێژنە من سەرۆكێ هەرێمێ، دەمێ من گۆتیە هەوە ئەز پێشمەرگێ شۆرەشا ئیلۆنێ و گولانێ مە ل نك من مەزنترین پۆستە و مەزنترین شەرەفە، من دڤیا ئەز مالا كورد رێكبێخم و جارەكا دی خوینا كوردان ب دەستێ كوردان نەهێتە رێتن، من دڤیا ڤی وەلاتی بكەمە وەلاتەكێ دەزگایی، پێگەهەكێ وەسا بۆ ڤی مللەتی دروست بكەین ل دەرڤە ژ روویێ دبلوماسی ڤە كو ژ هەژی خەبات و قوربانیدانا ڤی مللەتی بیت و خۆ بۆ پاشەرۆژێ ئامادە بكەین، ژ بەر كو دونیا یا د گوهۆڕینێ دا، ب راستی هەر تشتەكێ ببیت رەنگە ئەم دێ پەنایێ بۆ بەین، بۆ هندێ ڤی بارودۆخی چارە بكەین، لێ شەرێ كورد و كورد نابیت دروست بیتەڤە، نە ل ڤێرە و نە ل چو جهان و نە ل گەل چو هێزێن كوردستانی، ئاموژگاریا من ئەوە بۆ هەموو ئالیەكی ب شەر ئاریشە چارەسەر نابن، ئیلا پێدڤیە ب ئاشتی و لێكتێگەهشتن بیت، هەكە رێكا ئاشتیێ هاتە هەلبژارتن ئەم یێ د خزمەتا هەموو ئالیەكی دا و هەر چو یا مە بدەست بهێت دێ كەین، هەكە هەلبژارتن هەلبژارتنا شەری بیت، ئەڤە نوكە ئەز دوپات دكەم، ئەنجام نابیت خوینەكا زێدەتر دێ هێتە رێتن و گەلەك حەیفە ژی چ خوینا كوردەكێ یان توركەكی، چ فارسەكێ چ عەرەبەكێ و یا هەر مرۆڤەكێ بێی ئەگەر بهێتە رێتن، جهێ داخەكا مەزنە ب راستی، ژ بەر كو مالەك خێزانەك دێ داخدار بیت، ناحیا مرۆڤایەتی ئەڤە تشتەكێ گەلەك یێ نەخۆشە و ئەنجام ژی نابیت، ژ بەر هندێ دەمێ كو پێدڤی نەبیت تو شەری بكەی و تو شەری بكەی تو یێ بارودۆخێ خۆ تێك ددەی و تویێ دۆزا خۆ تێك ددەی. نە ب تۆپ و فرۆكان ئەڤ كێشە ب دووماهیك دهێت نە ب كوشتنا چەند لەشكرەك و چەند پاسدارەكان، ئەڤ ئاریشە ب دوماهیك دهێت ئەڤە ئیلا پێدڤیە ب ئاشتی و لێكتێگەهشتن بیت، هەكە ب ئاشتی بیت وەكو من گۆتی ئەم یێ د خزمەتا هەموو ئالیەكی دا، و هەكە د رژد ژی بن ل سەر شەری ب راستی هەر چو مە بدەست بهێت دێ كەین، ژ بۆ هندێ كو ئەڤ شەرە ل هەرێما كوردستانێ دوور بكەڤیت و ژ ڤێ زێدەتر مە پێ چێ نابیت ئەم بكەین، جارەكا دی ژی ئاموژگاریا من ئەوە هەموو ئالی بەر ب ئاشتیێ بچن و خیارا ئاشتی و لێكتێگەهشتنێ هەلبژێرن نەك خیارا شەری.

ئەڤە بابەتەك بوو من دڤیا بۆ هەوە ئاماژێ پێ بدەم، ژ بەر كو ب راستی بۆ من یا گرنگە و ئەز دزانم بۆ هەوە هەموویان ژی یا گرنگە و ئەڤەیە سیاسەتا مە و ئەڤەیە بڕیارا مە.

یا دی ئەز حەز دكەم هوون د پشتراست بن دۆزا كوردی ل وێ چوو دەرێ كو بەر ب پاش بهێت، مەسەلا مە دێ بەر ب پێش چیت و بەر ب پاش ناهێتە ڤە و هەموو پێنگاڤێن خۆ ژی ئەم دێ ب دیراسەت هاڤێژین و سوپاس بۆ خودێ ئەڤرۆ ئەو پێگەهێ بۆ كوردستانێ دروستبووی، ل دونیایێ گەلەك خەلكەك حەسویدیێ ب مە دبەن.

بەرنامێ من دانایی بۆ چاكسازیێ د هەرێمێ دا، سەبارەت من گەلەك مەسەلەكا گرنگە، و ئەز یێ رژدم ل سەر و بۆ هەوە دوپات دكەم، ئەز دێ ل سەر چم و بابەتێ چاكسازیێ د شیاندا نینە دەستا ژێ بەر دەم هەتا دگەهمە هەموو راستیان و هەتا هەموو پێرابوونێن پێدڤی ژی بهێنەكرن.

ل دووماهیێ ئەز چو ئاخڤتنێن دی نابینم كو پێدڤی بن ب بێژم ئیلا ئەو نەبیت كو بێژمە هەوە هەموو مللەتێ كورد یێ عەزیزە ل دەڤ من، هەموو خویشك و برایێن منن، بەس هوون خەلكێ ڤێ دەڤەرا زاخۆ ب راستی هوون روحا منن                 10 أيلول, 2011
.