سەرۆك مسعود بارزانی لە كۆنگرەی 3ی تەندروستی میزۆپۆتامیا لە دهۆك به روارى 28\10\2011 وتارێكی پێشكەشكرد}{كە ئەمە دەقەكەیەتی: |  |
ب ناڤێ خوه‌دایێ مه‌زن و دلۆڤان
خوشك و برایێن به‌ركه‌فتی
هون هه‌موو ب خێرهاتن، سه‌رچاڤان
هون ب خێرهاتن بۆ دهۆكا ره‌نگین و بۆ هه‌رێما كوردستانێ
ئه‌ز پر ب دل سوپاسیا وه دكم ژ بۆ ڤێ زه‌همه‌تیا وه كێشایی هون ژ رێكێن دوور هاتنه بۆ سازدانا ڤێ كۆنگره‌یێ و ئەز سوپاسیا وان هه‌موو براده‌ران دكم كو زه‌همه‌ت كێشایی و ئەڤ كۆنگره‌یه ئاماده‌كری. بێگومان هه‌ر نه‌ته‌وه‌یه‌ك دێ شانازیه‌كه مه‌زن بكه‌ت وه‌ختێ وی سه‌رمایه‌یه‌كه وها مه‌زن هه‌بیت.
هه‌بوونا ڤان هه‌موو زانایان بۆ هه‌ر مڵه‌ته‌كی جهێ سه‌رفرازیه‌كه مه‌زنه ئەم ژی سه‌ربه‌رزن و سه‌رفرازین كو ئەڤ هه‌موو كه‌چ و كورێن كورد خوه پێگهاندیه و ئەڤرۆ ل ڤێ ئاستا مه‌زندانه ل زانستێ و هه‌موو نوژدار و زانا و براستی زۆر زه‌همه‌ته ئەز ب په‌یڤه‌كی بكارم تعبیرێ ل ڤێ خوه‌شهالیا خوه بكم وه‌ختێ كو ئەز وه دبینم.
ئه‌ز پر ب دل هێڤیدارم كۆنگره‌یا وه یا سه‌ركه‌فتی بیت، و ئەو ئارمانجێن وه ڤێ كۆنگره‌یێ گرێدایی ب ده‌ست بینن و ئەز هێڤیدارم كو ئەڤ كۆنگره ببێته سه‌ده‌ما پێشكه‌تنا سیسته‌ما ته‌ندورستیا كوردستانێ و هێڤیدارم هون زه‌همه‌تێ بكێشن و ئالیكاریا مه بكن و پشته‌ڤانیا مه بكن وه‌كو هه‌رێما كوردستانێ وه‌كو وه‌زاره‌تا ته‌ندورستی و ده‌زگه‌هێن ته‌ندروستیێ ل كوردستانێ ئەم سیسته‌ما ته‌ندورستیێ ل كوردستانێ ده پێش بخین. هه‌ر وها سیسته‌ما خوه‌ندنێ ل كۆلێژێن نوژداریێ مه دڤێ كور و كه‌چێن مه تێبگهن و ئاسته‌كی به‌رزێ زانینێ.
خوشك و برایێن خوه‌شدڤی
گه‌لێ كوردستانێ قوربانیه‌كه زۆر دا، چه‌ندین ساله شۆره‌شا چه‌كداری، جاره‌ك ل ڤێ په‌رچێ جاره‌ك ل وێ په‌رچێ، به‌ری چه‌ند سالا ئەم مه‌جبور بوین شۆره‌شا چه‌كداری بكن، بۆ وێ هندێ پێناسا نه‌ته‌وه‌یا خوه بپارێزین، ئەڤرۆ شكر ژ خوه‌دێ ره ل هه‌رێما كوردستانێ شۆره‌شا ئاڤادانكرنێ و شۆره‌شا زانستێ و شۆره‌شا پێگهاندنا نفشه‌كه نوو ل كوردستانێ، شۆره‌شا ده‌زگه‌هیكرنا هه‌رێما كوردستانێ یه، پێشمه‌رگه‌یێن ڤێ شۆره‌شا ئاڤادانكرنێ و شۆره‌شا زانستێ هونن. پێشمه‌رگه‌یێن قه‌هره‌مان ده‌ورێ خوه دیت كوردستان رزگاركر، زۆر كه‌س شه‌هیدبوون زۆر قوربانی هاته داین، ئەڤرۆ ئەركێ پێشمه‌رگایه‌تیا ئاڤادانكرنێ و زانستێ و پێگهاندنێ دكه‌ڤه ل سه‌ر ملێن وه. و ئەم هێڤیدارین هون ژی رۆلا خوه ب سه‌ركه‌فتی ببینن و كوردستانێ ژ بۆ مه بگهینن ئاسته‌كی كو ل ئاستا هه‌موو جیهانێ ده ئەم پێ سه‌ربه‌رز ببین.
خوشك و برایێن به‌ركه‌فتی
ئه‌م وه‌كی نه‌ته‌وه‌یه‌ك وها دبینن ب درێژاهیا دیرۆكێ ده خه‌دره‌كه مه‌زن ل مه هاته كرن، هه‌موو مڵه‌ت بوونه خوه‌دیێ ده‌وله‌تا خوه و بوونه خوه‌دیێ كیانا خوه، ب تایبه‌تی دوماهیا جه‌نگا جیهانی یا یه‌كه‌م ئەو مڵه‌تێ خه‌دره‌كه مه‌زن لێ هاته كرن گه‌لێ كوردستانێ بوو نه‌ته‌وه‌یێ كورد بوو. ژ به‌ر كو نه پرسیارا مه هاته كرن وه‌كو مڵه‌ته‌ك وه‌كو نه‌ته‌وه‌یه‌ك، گه‌لۆ وه دڤێت سه‌ربخوه بن، یان وه دڤێت ل گه‌ل ڤێ ده‌وله‌تێ بن یا ل گه‌ل ڤی ده‌وله‌تی دا بن راستیه‌ك ل سه‌ر مه هاته فه‌رزكرن. د راستیێ ده ئەم یه‌ك نه‌ته‌وه‌ین، لێ واقعئەك هاتیه فه‌رزكرن. ئەز دبینم ل هه‌ر پارچه‌یه‌كی لازمه مافێن ره‌وایێن گه‌لێ كورد ب ده‌ستبێن لێ ب رێیه‌كه ئاشتی و رێیێن ده‌مۆكراتی. گه‌له‌ك جاران من ل گه‌ل به‌رپرسێن سیاسی یێن برایێن مه یێن ئە‌ره‌ب، برایێن مه یێن تورك و برایێن مه یێن فارس مه موناقه‌شه كریه، به‌هس هاتیه كرن. من گۆتیە په‌یاما مه په‌یاما ئاشتیه مه دڤێ ئەم برا بین، لێ ئەم ژی نه‌ته‌وه‌یه‌كین، ئەم نه ژ وه كێمترین و نه ژ وه زێده‌ترین، هه‌تا وێ ده‌مێ كو برایێن مه یێن ئە‌ره‌ب و برایێن مه یێن تورك و برایێن مه یێن فارس بگهن وێ باوه‌ریێ كو به‌لێ مه ژی وه‌كی وان ماف هه‌یه، لازمه هه‌ر په‌رچه‌یه‌كی مافێ خوه وه‌ربگرن.
خوه‌شبه‌ختانه هه‌م دنیا هاته گوهه‌رتن و هه‌م نێرینێن سیاسیێن ڤان ده‌وله‌تان ژی هاته گوهه‌رتن، لازمه ئەم ژی زۆر تشتێن خوه بگوهه‌رن، ده‌ما لازم بوو ئەم شه‌ر بكن مه شه‌ر كر، تاساورا من قانەعەتا من و ته‌جروبه‌یا مه نها پێ ناڤێت ئەم شه‌رێ ب كلاشنیكۆف و ئار پی جیان بكن، ئەمێ شه‌رێ ده‌مۆكراتیه‌تێ بكن لێ ب چه‌كێ ده‌مۆكراسیێ، ب چه‌كێ ئاشتیێ و ب چه‌كێ مافێ ره‌وایێ خوه ئەمێ شه‌رێ خوه بكن. نه دنیا هازره نها ب ده‌نگێ كلاشنیكۆف و ئار پی جیان تێبگهه و نه ژی ئەنجاما خوه دبه، ئەنجام دێ ب مانتق بێ دێ ب ئاقل به، دێ ب هیكمه‌ت به.
وه‌ختێ من قه‌بولكر سه‌رۆكایه‌تیا هه‌رێما كوردستانێ من چه‌ند هه‌ده‌فه‌ك هه‌بوو، هه‌ما دو هه‌ده‌فێن زۆر زۆرێ سه‌ره‌كی من هه‌بوو كو ئەز د ژیانا خوه ده بكاربم ب وێ خزمه‌تا گه‌لێ كوردستانێ بكم،
یه‌ك، جاره‌كه‌دن هچ ده‌رفه‌ته‌ك نه‌مینه ژ بۆ تو كه‌سه‌كی كورد شه‌رێ كورد بكه، هه‌ر چیه‌ك ببه بلا ببه نابێ خوینا كورێ كورد ب ده‌ستێ كورێ كورد بێته رێهتن. لێ به‌لێ پێدڤیه ئەم وه‌كو كورد موراعەتا ره‌وشا هه‌ڤدوو بكین، ئەو ره‌وشا كو ل هه‌رێما كوردستانێ هه‌یه ئیرۆ لازمه هه‌موو كورده‌ك موراعەتا ڤێ ره‌وشێ بكه. پشته‌ڤانیا مه بكن، بۆ هندێ ئەڤ ره‌وش جیهگر ببه، باشتر ببه، ب هێزتر ببه نه كو كێشه ژ بۆ مه بێنه دروست كرن.
یه‌ك، جاره‌كه‌دن هچ ده‌رفه‌ته‌ك نه‌مینه ژ بۆ تو كه‌سه‌كی كورد شه‌رێ كورد بكه، هه‌ر چیه‌ك ببه بلا ببه نابێ خوینا كورێ كورد ب ده‌ستێ كورێ كورد بێته رێهتن. لێ به‌لێ پێدڤیه ئەم وه‌كو كورد موراعەتا ره‌وشا هه‌ڤدوو بكین، ئەو ره‌وشا كو ل هه‌رێما كوردستانێ هه‌یه ئیرۆ لازمه هه‌موو كورده‌ك موراعەتا ڤێ ره‌وشێ بكه. پشته‌ڤانیا مه بكن، بۆ هندێ ئەڤ ره‌وش جیهگر ببه، باشتر ببه، ب هێزتر ببه نه كو كێشه ژ بۆ مه بێنه دروست كرن.
هه‌ده‌فێ دویێ ئەو بوو، كاره‌كی بكین زمانێ خوه‌ندن و نڤیسینێ ژ بۆ نه‌ته‌وه‌یێ كورد دروست ببه، ئەز زۆر پێ كێفخوه‌ش و سه‌ربه‌رزم كو هه‌ر چه‌نده ئەركێ وه نوژداریه هون نوژدارن، به‌س ماده‌م وه پێل مه‌سه‌له‌یا زمان كریه ئەڤه ل جه‌م من تشته‌كی گه‌له‌ك مه‌زنه و ئەز سوپاسیا وه دكم و هێڤیدارم هون بكارن د ڤی واری ژی دا رۆلا خوه ببینن چونكی براستی یه‌ك ژ وان موقاوه‌ماتێن هه‌ر نه‌ته‌وه‌یه‌ك ئەوه كو دڤێ زمانێ خوه هه‌بێ، نه ب ته‌نێ كورد مه زاراڤایێن جوودا جوودا هه‌یه، ئە‌ره‌بان ژی هه‌یه، توركان ژی هه‌یه، فارسان، ئە‌لمانان و هه‌موو مڵه‌تێن دنێ جیهانێ هه‌یه، لێ هه‌موویان زمانێ خوه‌ندن و نڤیسینێ هه‌یه. ئەم كورد ژی لازمه مه زمانێ خوه‌ندن و نڤیسینێ هه‌بێ، لێ ئەڤه كارێ پیسپۆرانه، لازمه پیسپۆر ژ بۆ مه ڤێ كارێ دروست بكن، چه‌ند وه‌خت ژی بڤێ نه پرسگرێكه لێ ئەز هێڤیدارم د ژیانا خوه ده ئەز ببینم ده‌ستپێكا ڤێ بێته كرن كو ئەم بنگه‌ها زمانێ كوردی دامه‌زرینن، زمانێ خوه‌ندن و نڤیسینێ.
هه‌موو هه‌ولێن مه دێ ژ بۆ ئاشتیێ بن ژ به‌ر كو براستی ئەم نه مڵه‌ته‌كی شه‌رخوازین، ئەگه‌ر ته‌ماشا دیرۆكێ ژی بكن ژ بۆ یه‌ك جاری ژی ئەم وه‌كو كورد نه‌چوونه ل سه‌ر ئەردێ تو مڵه‌ته‌كی دن ئەم نه‌چوونه ل سه‌ر ئاخا كه‌سی مه داخوازا ستاندنا مافێ كه‌سه‌كی نه‌كریه، هه‌رده‌م مه به‌رگریێ یان ل مافێ خوه یان ل ئاخا خوه كریه. هه‌تتا سیلاهێ مه وه‌كو خه‌نجه‌ر كو ره‌مزا كورده، سیلاهه‌كی به‌رگریێ یه، نه یێ ئێریشێ یه. لێ ئەم یه‌ك تشت فێربوونه كو نه مومكنه ئەم موساوه‌مه ل سه‌ر مافێ نه‌ته‌وه‌یا خوه بكن. وه‌ختێ لازم بوو ئەم بۆ وی خه‌باتا چه‌كداری بكن مه بۆ وی كر، نها ژی خه‌باتا دیپلۆماسی و خه‌باتا ده‌مۆكراسی خه‌باتا ئاشتیێ دكن و ئەز موته‌ئه‌كدم ئەنجام دێ سه‌ركه‌فتنێ ب ده‌ست بینه. مه ته‌جروبه هه‌نه، ته‌جروبا دو مڵه‌تان، هه‌ر چه‌نده ته‌جروبه‌یا مه ب خوه ژی ته‌جروبه‌یه‌كه زۆر ده‌وله‌مه‌نده، لێ ته‌جروبه‌یا ئە‌لمانیا و ته‌جروبه‌یا چه‌كۆسلۆڤاكیا، ئە‌لمانیا یه‌ك مڵه‌ت بوو، هاته دابه‌شكرن ب زۆرێ، پشتی چل پێنجیھ سالان دیسا هه‌ڤدوو یه‌كگرتن ژ به‌ر كو جوداكرنه‌كه نه سرووشتیبوو. جوداكرنه‌كه ب زۆرێ بوو و ل سه‌ر نه‌گرت. چه‌كۆسلۆڤاكیا چه‌ك و سلۆڤاك ب زۆرێ پێكڤه هاتن گرێدان پشتی ده‌مه‌كی دیسا ژ هه‌ڤدوو جودا بوون ژ به‌ر كو ب زۆرێ نه مومكینه تشت ل سه‌ر مڵه‌تان بێته فه‌رزكرن. مڵه‌ت لازمه ب ئیختیارا خوه ب هلبژارتنا خوه بریارا خوه بده، ئیختیارا مه وه‌كو مڵه‌تێ كورد ئیختیارا ئاشتیه لێ نه مومكنه هه‌تا هه‌تایێ مڵه‌تێ كورد ژێرده‌ست بمینه. مڵه‌تێ كورد ژی وه‌كی هه‌ر نه‌ته‌وه‌یه‌كه دن مافێ خوه‌یه ئەو ئازادیا كو هه‌موو مڵه‌ت پێ شاد بوونه ئەم ژی پێ شاد ببن. لێ ئەز جاره‌كه‌دن ژی دبێژم ئەمێ رێیا ئاشتیێ بگرن به‌ر نه كو رێكێن شه‌ر و كوشتن یێن دن...
تابی من نه‌ڤێت ئەز زێده‌تر درێژیێ بدم ئاخافتنێن خوه ژ به‌ر كو وه‌ختێ وه یێ پر بهایه و دا كو هون مه‌شكولێ كارێ ئەساسیێ خوه بن، لێ دوماهیێ من دڤێت جاره‌كه دن ئەز سه‌رخوه‌شیێ ل خوشك و برایێن خوه بكم ل ده‌ڤه‌را وانێ، و خوه‌دێ ئەوێن چوویی بده به‌ر دلۆڤانیا خوه و شفایێ ژ بۆ برینداران بشینه و ئەم هه‌ڤخه‌ما وانه و خه‌ما وان خه‌ما مه‌یه، جاره‌كه دن هون هه‌موو خوشك و برایێن كورد و دۆستێن مڵه‌تێ كورد هون هه‌موو ب خێرهاتن سه‌رچاڤان، هێڤیدارم وه‌خته‌كه خوه‌ش ده‌رباس بكن، هێڤیدارم كۆنگره‌یه‌كه سه‌ركه‌فتی به، و ب هێڤیا خوه‌دێ دێ هه‌ر سه‌ركه‌فتی به، و ب هێڤیا خوه‌دێ هه‌ر وها ژی ببینن مڵه‌تێ كورد پێكڤه به‌خته‌وه‌ر و شاد و سه‌ركه‌فتی به و زۆر زۆر سپاس...
No comments:
Post a Comment