له كۆبوونه‌وه‌یه‌كدا كه له‌لایه‌نی توركییه‌وه، دكتۆر ئیبراهیم كالن سه‌رۆكی راوێژكارانی سه‌رۆك وه‌زیرانی توركیاو له شاندی كوردستانیش دكتۆر فوئاد حوسێن سه‌رۆكی دیوانی سه‌رۆكایه‌تی هه‌رێمی كوردستان و دكتۆر خه‌سره‌و گول سه‌رۆكی ده‌زگای ئاسایشی هه‌رێمی كوردستان ئاماده‌ی بوون ، باسی بارودۆخی سیاسی و ئه‌منی ناوچه‌كه به گشتی و عێراق به‌تایبه‌تی كرا.
هه‌روه‌ها ئه‌و بارودۆخه ئاڵۆزه‌ی ئێستا ناوچه‌كه‌ی به گشتی گرتۆته‌وه‌و كاریگه‌ری ئه‌و بارودۆخه به‌سه‌ر ره‌وشی سیاسی ناوچه‌كه‌وه هه‌یه ته‌وه‌رێكی گفتوگۆی نێو كۆبوونه‌وه‌كه بوو و هه‌ردوولا ته‌ئكیدیان له‌سه‌ر ئه‌وه كرده‌وه كه پێویسته رێگه‌چاره‌كان له‌چوارچێوه‌ی گفتوگۆ و لێك تێگه‌یشتن و پاراستنی به‌رژه‌وه‌ندییه هاوبه‌شه‌كان بێت.
هه‌روه‌ها تاوتوێ كردنی بارودۆخی ئه‌منی سه‌ر سنوره‌كانی نێوان توركیاو هه‌رێمی كوردستان ته‌وه‌رێكی دیكه‌ی گفتوگۆی نێوان هه‌ردوولا بوو و گفتوگۆ له‌سه‌ر كاركردنی هاوبه‌ش كرا بۆ پاراستنی ئه‌من و ئاسایشی سنوره‌كان، و هه‌ردوولا له‌سه‌ر ئه‌وه كۆك بوون كه پرسی ئه‌منی پرسێكی هاوبه‌شی دوولایه‌نه‌یه و پێویسته میكانیزمی پاراستنی سنوره‌كان له‌سه‌ر بنه‌مای پاراستنی به‌رژه‌وه‌ندی هاوبه‌شی نێوان هه‌ردوولا بێت و كار بۆ پاراستنی زیاتری سنوره‌كانی نێوان هه‌ردوولا بكرێت به شێوه‌یه‌ك له به‌رژه‌وندی دانیشتوانی ناوچه سنورییه‌كانی توركیاو هه‌رێمی كوردستاندا بێت.
شایه‌نی باسه ئه‌مڕۆ به‌ڕێز نێچیرڤان بارزانی سه‌رۆكی حكومه‌تی هه‌رێمی كوردستان و شاندی یاوه‌ری دوای سه‌ردانێكی دوو رۆژی بۆ توركیاو دیدار و كۆبوونه‌وه‌كانی له‌گه‌ڵ عه‌بدوللا گویل سه‌رۆك كۆمار و ره‌جه‌ب ته‌یب ئه‌ردۆگان سه‌رۆك وه‌زیران و گه‌وره به‌رپرسانی دیكه‌ی توركیا كۆتایی به سه‌ردانه‌كه‌یان بۆ توركیا ده‌هێنن و ده‌گه‌ڕێنه‌وه هه‌رێمی كوردستان.
No comments:
Post a Comment