دەقی وتاری سەرۆك مسعود بارزانی، لە كۆنگرەی كوردانی سوریا

بە چاودێری و ئامادەبوونی سەرۆك مسعود بارزانی سەرۆكی كوردستان، كوردانی سوریا لە دەرەوەی وڵات، بەرەیەكی نیشتمانی و نەتەوەییان راگەیاند و لە كۆنگرەیەكدا سەرقاڵی یەكخستنەوەی گوتاری كوردین بۆ دوای ئەگەرەكانی رووخانی رژێمی سوریا، سەرۆك مسعود بارزانی لەم كۆنگرەیەدا وتارێكی پێشكەشكرد، ئەمەش دەقی وتارەكەیە:

ب ناڤێ خوەدایێ مەزن و دلۆڤان

خوشك و برایێن خوەشدڤی

ئامادەبویێن برێز..هون هەموو ب خێرهاتن سەرچاڤان..هون هاتنە مالا خوە و وەلاتێ خوە.

ئیرۆ، هەولێرا پایتەختا هەرێما كوردستانێ شاد و سەرفرازە ب هەبوونا وە. هێڤیدارم، كۆنگرەیا وە سەركەفتی بە و ئەو ئارمانجێن كو پێ ناڤێ وان دە ئەڤ كۆنگرە هاتیە بەستن، ب جیهبێن.

مەبەست ل ڤێ كۆنگرەیا رەڤەندا كوردێن رۆژاڤا ل دەرڤە، ژ بۆ وێ هندێ یە دیراسەت و نرخاندنا ئەڤ كاودانێن كو ئیرۆ ل دەڤەرێ هەیە و دهێنە كرن و بریارێن پێویست بێنە داین ژ بۆ خوە ئامادەكرنەك ژ بۆ هەر ئیهتیمالەك.

وەكی كو ئەم دبینین، گوهەرتنێن مەزن ل دەڤەرێ روودان، ئەڤە ل سالا بهوریدا و هەتا ئیرۆ، گوهەرتن بەردەوامە و ئەم ل وێ باوەریێ دانە، هیچ دەولەتەك و هیچ هێزەك نەكاریە خوە ل بەر ڤێ گوهەرتنێ بگرە. ژ بەر وێ یەكێ پێویستە گەلێ كورد ژی، خوە ئامادە بكە ژ بۆ هەر ئیهتیمالەك.

ژ بۆ مە رەوشا سوریە گەلەك گرینگە، یەك ژ بەر وێ هندێیە كو مە سینۆرەكە درێژ پێكڤە هەیە و ئەم جیرانن، دویەم پتر دو ملیۆن كورد ل سوریە دژین، ژ بۆ مە گرینگە ئەو گوهەرتنێن كو دهێنە كرن، یان دهێتە كرن، كا رەوشا كورد و برایێن مە یێن كورد ل سوریە دێ چاوا بە. درێژیا دیرۆكێ مەهروم بوونە ژ هەموو هەق و هقوقەكی، مەهروم بوونە ژ هەقێ وەلاتیبوونێ ژی، ژ بەر هندێ، مە پێ خوەشە ئامادەكاریەك باش بێتە كرن، ژ بۆ وێ هندێ هەر گوهەرتنەك كو ببە، هەلبەت لازمە گوهەرتنەك ئەرێنی ل رەوشا گەلێ كوردێن سوریە بكە.

هەلبەت گوهەرتن نە كارێ مە یە و نە كارێ تو ئالیەكە دنە، كارێ خەلكێ سوریە ب خوە یە. ئە‌رەب ڤە، ب كورد ڤە و ب هەموو نەتەوەیێن دن ڤە كو ل سوریە دژین. لێ ژ بۆ مە گرینگە و ئەم نكارن تەماشەڤان بین، ژ بۆ مە گرینگە ئەم بزانین ئەڤ گوهەرتن چاوا چێدبە.

مە نەڤێت ئەم ب تو ئاوایەكی دەستێ خوە بینین د ناڤ كارێ وە دە، مە دڤێت ئەم ئالیكاریا وە بكین ڤێ دەرفەتێ ژ بۆ وە برەخسێنین بۆ هندێ هون ل وەلاتێ خوە ل پایتەختا خوە ل هەوایەكی ئازادی بریارێن خوە بدن. هەر بریارەكە هون بدن، ئەمێ پشتگریێ ل وێ بریارا وە بكن. لێ تاوسیا مە ژ بۆ وە ئەوە، لازمە هەر بریارەكە كو هون بدن، دور بە ژ توندوتژیێ. لازمە رێیا ئاشتی و دەمۆكراتیێ هلبژێرن و رێیا دیالۆگێ بگرن بەر خوە. براستی ئەم نزانن كا رەوشا سوریە دێ چ لێ ببە. لێ هەموو شیرۆڤە ئەون كو دێ گوهەرتن ببن، ژ بۆ وێ یەكێ ئەو گوهەرتنێن كو دبن، لازمە هون ژی ئامادەبن ژ بۆ هەموو ئیهتیمالەك.

مەرجێ مە ژ بۆ پشتگریا وە ئەوە، یەكرێزیا وەیە، ڤێ فەترەیێ دە كو فەترەیەكە گەلەك گەلەك یا هەستیارە و هەسساسە، لازمە هون خوە دوور بێخن ژ بۆ هزبایەتیا تەسك و تەنگ. هەتا رەوشا سوریە دیار ببە، كوردایەتیەكە بەرفرەه بكن، هون هەموو، ل بن چەترا كوردایەتیێ دە كار بكن، رێز و ئیهتیرام ژ بۆ هزبایەتیێ و هزبێن وە و ژ بۆ وە هەموویان، لێ ب هزبایەتیا تەسك و تەنگ هونێ ڤێ دەرفەتێ ژ دەست بدن و ئەم ژی نكارین تشتەكی ژ بۆ وە بكین. ژ بەر وێ یەكێ جارەكە دن وەكی برایەكی وە وەكی كوردەك، هێڤیا من ئەوە هەتا رەوشا سوریە دیار ببە، خوە ژ هزبایەتیا تەنگ دوور بێخن و خیلافاتێن ناڤخۆ هەموویان ب جیه بهێلن، بەرەڤ پاشارۆژەكە رەوشەن بچن و ئەم د وێ باوەریێ دا نە ب هێڤیا خوەدێ دێ دەستكەفتێن مەزن ژ بۆ وە ژی بدەست بێن.

هەر ب ڤێ هەلكەفتێ من دڤێت بالبكشینم ل سەر وێ یەكێ كو هەر د ڤێ سالێ دە ئەمێ كۆنگرەیەكە بەرفرەه یا هەموو هێزێن كوردستانی ل هەر ڤی جهی ئەنجام بدین و مەبەست ژی ئەوە ئەم یەك خیتابا كوردستانی بەلاڤ بكین بۆ وان هەموو مڵەتێن كو ئەم پێكڤە دژین، بۆ جیهانێ ژی، ئەم مڵەتەكی ئاشتیخوازین، د دیرۆكێ دە خەدرەكە مەزن ل ڤی نەتەوەیی هاتیە كرن، ئەم تێدگهین كو ئیرۆ ئەم چ راستیەكە دەنە، و نە مومكونە ئەم دەڤ ژ خەباتا خوە بەردن لێ خەباتەكە ئاشتیانە و خەباتەكە دەمۆكراتیك خەباتەكە ب دیالۆگێ. ئە‌و زەمان چوو ئینكارا هەبوونا كورد بێتە كرن، زەمانێ چەكێ ژی چوو. ئیرۆ زەمانێ مانتقە، زەمانێ ئاشتیە، زەمانێ دەمۆكراتیەتێیە، زەمانێ پێكڤەژیانێیە، زەمانێ رووپەلەكە نوو یە ل ناڤبەرا مڵەتان دە.

مەبەستا مە ژ ڤێ كۆنگرەیێ ئەوە ئەم دەستێ برایەتیێ و ئاشتیێ درێژبكن بۆ برایێن مە یێن ئە‌رەب و تورك و فارس ژ بۆ جیهانێ ژی ببێژین، ئەم مڵەتەكی ئاشتیخوازین، نە ب شەر و چەك، بەلكو ب مانتق و ب ئاوایەكە ئاشتی ئەمێ بەردەوامبین ل سەر خەباتا خوە و داخوازا مافێن خوە بكن.

من نەڤێت ئەز زێدەتر دەما وە بگرم، جارەكە دن هون هەموو بخێرهاتن، سەرچاڤان، هون هاتنە مالا خوە، هون هاتنە ناڤ كەسوكارێن خوە، هێڤیا سەركەفتنێ ژ بۆ كۆنگرەیا وە دخوازم و هون هەر بژین، و هەر بژین بۆ كورد و كوردستان.