سه‌رۆك بارزانی په‌یامێكی پیرۆزبایی ئاراسته‌ی هه‌ردوو مه‌كته‌بی سكرتاریه‌تی (ی.ق.ك) و (ی.ل.د.ك) كرد

به‌ بۆنه‌ی 59‌مین ساڵه‌ی دامه‌زراندنی یه‌كێتی قوتابیانی كوردستان و یه‌كێتی لاوانی دیموكراتی كوردستان سه‌رۆك بارزانی په‌یامێكی پیرۆزبایی ئاراسته‌ی هه‌ردوو مه‌كته‌بی سكرتاریه‌تی یه‌كێتی قوتابیانی و لاوانی كوردستانی كرد ئه‌مه‌ش ده‌قه‌كه‌یه‌تی:

 ب ناڤێ خودێ مه‌زن و دلۆڤان

 خوشك و برایێن خۆشتڤی ل هه‌ردوو مه‌كته‌بێن سه‌كه‌رته‌ریێ یێن یه‌كێتیا لاوێن ده‌مۆكراتا كوردستان و یه‌كێتیا قوتابی یێن كوردستانێ

سڵاڤه‌كه‌ گه‌رم پێشكێشی وه‌ دكم.

   پیرۆزباهی یێن هه‌ری جوان ل وه‌ و هه‌موو خویشك و برایێن ئه‌ندام یێن قوتابی و لاوێن كوردستانێ دكم ب هه‌لكه‌تنا پێنجی و نه‌هه‌م سالڤه‌گه‌را دامه‌زراندنا هه‌ردوو رێخستی یێن وه‌ یێن ته‌كۆشه‌ر كو نوونه‌ریا ته‌خه‌كه‌ گرینگ و زیندی یا گه‌لێ كوردستانێ دكن و د چاخه‌كه‌ هه‌ری سه‌خت و دژوار یا خه‌بتینێ ده‌ كه‌تنه‌ قادێ و هه‌ر ل وێ رۆژێ ژی ڤه‌ ب تایبه‌ت د پێخستنیا شۆره‌شان ده‌ گه‌لێ مه‌ هه‌رتم ب پشت گرێدان ب ڤان دوو ته‌خان ده‌ست ئاڤێتیه‌ خه‌بتینێ و نها ژی وه‌كه‌ چه‌وا د رێزا پێشیێ یا خه‌بتینێ ده‌ بوون ب هه‌مان خورتیا جاران و حه‌ماسه‌تا شۆره‌شگیریا كو هون پێ هاتنه‌ ناسین؛ خه‌ون و هیڤی یێن گه‌ل و نیشتمان و هه‌موو قوتابی و لاوێن كوردستانێ ب هاریكاریا هه‌موو رێخستی یێن قوتابی و خوه‌نده‌كاری و گه‌نج و لاوان پێكبینن.

  دیرۆكا ڤان دوو رێخستیان دیرۆكه‌كه‌ پر ژ سه‌رفه‌رازی و به‌رخوه‌دان و به‌رگریی بوویه‌ له‌ورا ئیرۆ جهێ شانازیا هه‌موو گه‌لێ كوردستانێ نه‌ و ب راستی دوو قوتابخانه‌ یێن شۆره‌گێر و ته‌كۆشین و پێگه‌هاندنا كادرۆ و سه‌ركردێن خوه‌دی كارین بوونه‌ ژبۆ ته‌ڤگه‌را رزگاریخوازا گه‌لێ كوردستانێ كو ئیرۆ ژبۆ پێگه‌هاندنا كادرۆیان د وارێ ده‌ستهلات و برێڤه‌برنا كاران ده‌ دخه‌بتن؛ له‌ورا دڤێ ژبۆ پێكانینا ڤێ ئارمانجێ هه‌ردوو رێخستی ب پلان و پرۆگرامێن بێتر و هه‌ری مۆده‌رن كارێ پیشه‌یی و سڤیلێن خوه‌ بكن و ته‌ڤی به‌رگریكرن ل مافێن لاو و قوتابیان؛ هه‌روه‌ها به‌رگریكارێن خورت یێن هه‌موو بده‌ستخستی یێن گه‌لێ مه‌ بن كو ب خوینا هه‌موو شه‌هیدان و خه‌بتین و قوربانیدان و هێسرێن دایكان هاتنه‌ بده‌ستخستن.

  د هه‌مبه‌ر ده‌ دڤێ هوكوومه‌تا هه‌رێما كوردستانێ ژیانه‌كه‌ ئازاد و ده‌رفه‌تا هه‌ری باش یا خواندن و ژیانێ ژبۆ وانا گارانتی بكه‌ و دڤێ هه‌وجه‌یی و خوه‌سته‌كێن وان پێكبینه‌.

  جار دن پێنجی و نه‌هه‌م مۆما خه‌بتینا وه‌ پیرۆز دكم و ئه‌ز پشتراستم ب هه‌مان جانێ جاران وه‌كه‌ دوو بیرهاتنێن مه‌زن یێن بارزانیێ نه‌مر هه‌ر دێ وه‌كه‌ سه‌رێ رم و شوره‌یا پۆلایین بمینن و ب چه‌كێن زانست و مۆده‌رن د قادا پیشه‌یی و ده‌مۆكراسیێ ده‌ دێ رۆلا به‌ربچاڤ و ئه‌رێنیا خوه‌ بلیزن.

هه‌ر شا و سه‌رفه‌راز بن

مسعود بارزانی

17\2\2012